විදෙස් වෘත්තිකයන්ට නිදහසේ එන්න ඉඩදෙන වගන්තියක් සිංගප්පූරු වෙළෙඳ ගිවිසුමේ නෑ – මහ බැංකුවේ අධිපති ඉන්ද්රජිත් කුමාරස්වාමි
තමන් ශ්රී ලංකා සිංගප්පූරු වෙළෙඳ ගිවිසුම සම්පූර්ණයෙන්ම කියැවූ බවත් වෘත්තිකයන්ට නිදහසේ මෙරටට පැමිණීමට ඉඩදෙන කිසිදු වගන්තියක් එහිදී තමන්ට දැකගත නොහැකි වූ බවත් ශ්රී ලංකා මහ බැංකුවේ අධිපති ඉන්ද්රජිත් කුමාරස්වාමි මහතා ප්රකාශ කළේය.
වෘත්තීයවේදීන්ට මෙරටට නිදහසේ පැමිණීමේ ඉඩ ලබාදී ඇතැයි කියන වෘත්තීයවේදීන් හෝ වෙනත් උදවිය එම අනතුර ඇත්තේ ගිවිසුමේ කුමන වගන්තිය හෝ වගන්ති මඟින්ද යන්න පෙන්වා දිය යුතු බවත් එවැනි කිසිදු කරුණු දැක්වීමක් තමන්ට අසන්නට නොලැබුණු බවත් මහ බැංකු අධිපතිතුමා වැඩිදුරටත් ප්රකාශ කළේය.
ශ්රී ලංකා බැංකුකරුවන්ගේ සංගමයේ 24 වන උපාධි ප්රධානෝත්සවයට පසුගිය 19 දා අඟහරුවාදා සහභාගි වෙමින් අදහස් දැක්වූ කුමාරස්වාමි මහතා වැඩිදුරටත් කීවේ ඕනෑම කරුණක් ගැන විරෝධය දැක්වීමට හෝ සාකච්ඡා කිරීමට සෑමදෙනාටම අවස්ථාව තිබිය යුතු බවත් එසේ වූවද එබඳු විරෝධතා හා කරුණු දැක්වීම් සත්ය කරුණු මත පදනම් විය යුතු බවත්ය.
“අපට මේ වනවිට ඉන්දියාව සමඟ වෙළෙඳ ගිවිසුමක් ඇති අතර එය වඩාත් පුළුල් කිරීමේ උත්සාහයක් ඇති අතර යුරෝපයේ ජී.එස්.පී. ප්ලස් සහනය ලබාගෙන තිබෙනවා. චීනය සමඟ වෙළෙඳ ගිවිසුම අත්සන් කරන්නට අපට හැකිවුවහොත් චීනය, ඉන්දියාව හා යුරෝපය යන වෙළෙඳ පොළ තුනටම වරණාත්මකව පිවිසීමේ අවස්ථාව ඇති එකම රට බවට අප රට පත්වනවා. එයත් භූගෝලීය වශයෙන් රටේ පිහිටීමත් මත මෙරටට විදේශ ආයෝජන ලබාගැනීමේ විශේෂ ඉඩකඩක් හිමිවනවා”යි මහ බැංකු අධිපතිවරයා මෙහිදී වැඩිදුරටත් ප්රකාශ කළේය.
කෙසේ වෙතත් විශාල රටක් හා කුඩා රටක් අතර ගිවිසුමක් සකස් කරනවිට කුඩා රටට වැඩි ආරක්ෂාවක් ලබාගත යුතු බවත්, මෙරට වෙනුවෙන් සාකච්ඡාවලට සහභාගී වන පිරිසට එම අවබෝධය හා හැකියාව ඇති බවත් ඉන්ද්රජිත් කුමාරස්වාමි මහතා මෙහිදී පැවැසීය.