ශ්‍රීලනිපය ප්‍රමුඛ පක්ෂ-සංවිධාන 21ක් ඇතුළත් පොදුජන එක්සත් පෙරමුණේ සහාය ජනපතිට – නායක අනුර ප්‍රියදර්ශන යාපා කියයි
රාජ්‍යයේ අයිතිය සුරක්ෂිත කරමින්, සියලු දෙනා ඒකරාශි කර ගනිමින් බිඳ වැටුණු රට සුරක්ෂිත කිරීම සඳහා ඉදිරි ජනාධිපතිවරණයේදී ශ්‍රී ලංකා නිදහස් පක්ෂය ප්‍රමුඛ පක්ෂ සහ සංවිධාන 21ක සහයෝගයෙන් ඇති කළ පොදුජන එක්සත් පෙරමුණ ජනාධිපති රනිල් වික්‍රමසිංහ මහතාට සහයෝගය ලබාදීමට තීරණය කළ බව පොදුජන එක්සත් පෙරමුණේ නායක, පාර්ලිමේන්තු මන්ත්‍රී අනුර ප්‍රියදර්ශන යාපා මහතා ඊයේ (14) ප්රකාශ කළේය.
ඉදිරි ජනාධිපතිවරණය ඉලක්ක කර යුගයේ අවශ්‍යතාවක් ඉටු කිරීමට නව සන්ධානය ගොඩනඟන බවද අනුර ප්‍රියදර්ශන යාපා මහතා පැවසීය.
ශ්‍රී ලංකා නිදහස් පක්ෂයේ සභාපති ඇමැති නිමල් සිරිපාල ද සිල්වා මහතා මෙරට ආර්ථික හා දේශපාලන දේහයට පීඩාවක් බවට පත්ව ඇති පවුල් දේශපාලනය මෙරටින් තුරන් කළ යුතු බව පැවසීය. පියාගෙන් පුතාට, පුතාගෙන් මුනුබුරාට දේශපාලනය යන පවුල් ක්‍රමවේදය අවසන් කළයුතු බවත් ඇමැතිවරයා අවධාරණය කළේය.
ශ්‍රී ලංකා නිදහස් පක්ෂය ඇතුළු දේශපාලන පක්ෂ සහ සංවිධාන 21ක් පොදුජන එක්සත් පෙරමුණ ලෙස සන්ධාන ගතවීම ඊයේ (14) බත්තරමුල්ල වෝටර්ස් එජ් හෝටලයේදී සිදු වූ අතර පොදුජන එක්සත් පෙරමුණ 21කගෙන් යුත් නායකත්ව මණ්ඩලයක් යටතේ ක්රියාත්මක වේ.
පොදුජන එක්සත් පෙරමුණේ නිලධාරි මණ්ඩලයේ ප්‍රධාන අනුශාසක ලෙස නව සන්ධානය නියෝජනය කරමින් ජෝන් සෙනෙවිරත්න, නායක ලෙස පාර්ලිමේන්තු මන්ත්‍රී අනුර ප්‍රියදර්ශන යාපා, ලේකම් ලෙස ශ්‍රී ලංකා නිදහස් පක්ෂයේ ලසන්ත අලගියවන්න, භාණ්ඩාගාරික ලෙස නව සන්ධානයේ චාමර සම්පත් දසනායක, ජාතික සංවිධායකවරුන් ලෙස ශ්‍රී ලංකා නිදහස් පක්ෂයේ දුමින්ද දිසානායක, නව සන්ධානයේ නලින් ප්‍රනාන්දු මහත්වරුන් ඇතුළු පිරිසක් පත් කර ඇත.
ශ්‍රී ලංකා නිදහස් පක්ෂයේ නිමල් සිරිපාල ද සිල්වා, මහින්ද අමරවීර, දුමින්ද දිසානායක, ලසන්ත අලගියවන්න, ජගත් පුෂ්පකුමාර, සූරේන් රාඝවන්, නීතිඥ ෆයිසර් මුස්තාපා, නව සන්ධානය නියෝජනය කරමින් අනුර ප්‍රියදර්ශන යාපා, සුසිල් ප්‍රෙම්ජයන්ත, ජෝන් සෙනෙවිරත්න, නිමල් ලාන්සා, ප්‍රියංකර ජයරත්න, නලින් ප්‍රනාන්දු, චාමර සම්පත් දසනායක, උදයකාන්ත ගුණතිලක, සුදත් මංජුල, ජගත් ප්‍රියංකර, ඊළාම් ප්‍රජාතන්ත්‍රවාදී ජනතා පක්ෂයේ නායක ඩග්ලස් දේවානන්දා, ඉලංගෙයි මහජන කොංග්‍රසයෙන් ස්වාධීන වූ එස්.එම්.එම්. මුසාරෆ් සමගි ජන බලවේගයෙන් ස්වාධීන වූ ඉෂාක් රහුමාන්, මුත්පෝක්කු තමිලර් කලකම් පක්ෂයෙන් ස්වාධීන වූ එස්. වියාලේන්ද්‍රන්, ජාතික නිදහස් පෙරමුණෙන් ස්වාධීන වූ මොහොමඩ් මුසම්මිල්, නිදහස් ජනතා සභාවෙන් ස්වාධීන වූ උදයන කිරිඳිගොඩ, ශ්‍රී ලංකා මහජන පක්ෂයේ නායක අසංක නවරත්න, ලංකා සම සමාජ පක්ෂයේ මහාචාර්ය තිස්ස විතාරණ, යුතුකම ජාතික සංවිධානයෙන් ස්වාධීන වූ අනූප පැස්කුවල්, එක්සත් ප්‍රජාතන්ත්‍රවාදී සන්ධානයේ නසිර් අහමඩ්, ස්වාධීන කණ්ඩායමක් ලෙස දකුණු පළාත් ආණ්ඩුකාර ලක්ෂ්මන් යාපා අබේවර්ධන, ස්වාධීන කණ්ඩායමක් ලෙස හිටපු ශ්‍රී ලංකා ඉන්දියානු තානාපති මිලින්ද මොරගොඩ, නව ජනතා පෙරමුණේ නායක සුගීෂ්වර බණ්ඩාර, දේශ විමුක්ති ජනතා පක්ෂයේ ඩී. කලංසූරිය මහතා ඇතුළු පිරිසක් පොදුජන එක්සත් පෙරමුණ සමඟ සන්ධාන ගත වූහ.
පොදුජන එක්සත් පෙරමුණ ප්‍රමුඛ සන්ධානයේ නිල වෙබ් අඩවිය එළිදැක්වීම ද මෙහිදී සිදුවිය. සැමට වෙනස් දැක්මක් සැමටම සුබවාදී අනාගතයක් යන තේමාව යටතේ People’s Alliance වෙබ් අඩවිය එළි දක්වනු ලැබීය.
පොදුජන එක්සත් පෙරමුණේ ජාතික සංවිධායක, ශ්‍රී ලංකා නිදහස් පක්ෂයේ ප්‍රධාන ලේකම් දුමින්ද දිසානායක මහතා-
“ඉතිහාසයේ දැවැන්තම සන්ධානය ගොඩනඟා ඇත්තේ ශ්‍රී ලංකා නිදහස් පක්ෂයයි. එක්සත් ජනතා නිදහස් සන්ධානය ලෙස අපි පළාත් පාලන මැතිවරණ, පාර්ලිමේන්තු මැතිවරණවලට ඉදිරිපත් වී තරග කර තිබෙනවා. අද වනවිට පොදුජන එක්සත් පෙරමුණ ලෙස අපි සන්ධාන ගත වෙනවා. ඒ වටා පක්ෂ විශාල සංඛ්‍යාවක් ඒකරාශි වී සිටිනවා. අපගේ සන්ධානය වටා තවත් පක්ෂ ගණනාවක්, සංවිධාන ගණනාවක් ඒකරාශී වීමට අපේක්ෂාවෙන් සිටිනවා. මේ සන්ධානගත වීම ආරම්භයක් පමණයි. එදා එක්සත් ජනතා නිදහස් සන්ධානයට නායකත්වය ලබාදුන් හිටපු ඇමැති අනුර ප්‍රියදර්ශන යාපා, ඇමැති සුසිල් ප්‍රේම්ජයන්ත මහත්වරු අදත් නායකත්වය ලබාදෙනවා.
අද අපි අලුත් දේශපාලන ගමනකට මුල පුරනවා. අද විශාල පිරිසක් මේ ස්ථානයට පැමිණ සිටින්නේ මෙරට සන්ධාන ඉතිහාසයේ අලුත් පිටුවක් සංකේතවත් කරන්න. සන්ධාන ඉතිහාසයේ ශ්‍රී ලංකා නිදහස් පක්ෂය ප්‍රබල ස්ථානයක් හැමදාමත් හිමි කර ගත්තා. සුසිල් ප්‍රේම්ජයන්ත, අනුර ප්‍රියදර්ශන යාපා යන දෙපළම ශ්‍රී ලංකා නිදහස් පක්ෂය නියෝජනය කරමින් මෙරට සන්ධාන දේශපාලනයේ ශක්තිමත් අඩිතාලම් දැමූ දෙපළක්. මේ නිර්මාණය වන්නේ මෙරට දැවැන්තම සන්ධානයයි. පොදුජන එක්සත් පෙරමුණ ගොඩනඟන මේ සන්ධානය ඉදිරියේදී මුළු රටේම අනාගතය තීරණය කරන ප්‍රබල සාධකයක්. අද රට ඔසවා තබන්නට හැකිවන්නේ අප නිර්මාණය කළ මේ සන්ධානයෙන්. ඉතිහාසය පුරාම වැටිච්ච රටක් ගොඩගැනීමේ හයිය දී ඇත්තේ පොදුජන එක්සත් පෙරමුණයි. අපි ඕනෑම මැතිවරණයකට ඕනෑම අවස්ථාවක සූදානම්. පාර්ලිමේන්තුවේත් විශාලතම මන්ත්‍රී කණ්ඩායම අප සතුව සිටිනවා. ඉන් පිටතත් දැවැන්ත වෘත්තිය සමිති ව්‍යාපාරයක්, අනුබද්ධ සංවිධාන ජාලයක්, ජාතික සංවිධාන විශාල සංඛ්‍යවක් අපි සමඟ සිටිනවා. ඒ අනුව අද අපි අලුත් දේශපාලන ගමනක් යන්නට සූදානම්.”
ශ්‍රී ලංකා නිදහස් පක්ෂයේ සභාපති, වරාය හා නාවික කටයුතු ඇමැති නිමල් සිරිපාල ද සිල්වා මහතා-
අතීතයේ සිට අප පුරුදූ වී සිටියේ නායකයන් පසුපස ගමන් කරමින් දේශපාලන පක්ෂ ශක්තිමත් කිරීමටයි. නමුත් බොහෝ අවස්ථාවලදී දේශපාලන පක්ෂ නායකයන් නිසා දේශපාලන පක්ෂ විනාශ වුණා. හොඳම උදාහරණය ශ්‍රී ලංකා නිදහස් පක්ෂය. ශ්‍රී ලංකා නිදහස් පක්ෂයේ හිටපු නායකයා නිසා පක්ෂය විනාශ වුණා. විනාශ වූ පක්ෂය අපි නැවත වතාවක් ගොඩනඟමින් සිටිනවා. හිටපු සභාපතිවරයා ඉවත්වූවාට පසු ශ්‍රී ලංකා නිදහස් පක්ෂය ශක්තිමත් ලෙස ගොඩනැඟීමට අපි තීරණය කළා. ඒ වෙනුවෙන් නව නිලධාරී මණ්ඩලයක් මේ වනවිට පිහිටුවා තිබෙනවා. පොදුජන එක්සත් පෙරමුණ තුළ ශ්‍රී ලංකා නිදහස් පක්ෂයට සියයට පනස් එකක වැඩි ඉඩක් තිබුණා. නමුත් අපි එයද ප්‍රතික්ෂේප කර තවත් පක්ෂවලට වැඩි ඉඩක් ලබාදීමට තීරණය කළා. ඇතැම් දේශපාලන පක්ෂවල නායකයන් විසින් පවත්වාගෙන යන කිචන් කැබිනට් අපි ළඟ නැහැ. පොදුජන එක්සත් පෙරමුණ ක්රියාත්මක වන්නේ නායකත්ව මණ්ඩලයකින්.
ශ්‍රී ලංකා නිදහස් පක්ෂය වසර එකහමාරක කාලයක් පුරාවට විවිධ දේශපාලන කණ්ඩායම් සමඟ සාකච්ඡා කළා. ප්‍රජාතන්ත්‍රවාදය පදනම් කරගනිමින්, ජාතිවාදි නොවන ආකාරයට සියලු දේශපාලන කණ්ඩායම්, දේශපාලන පක්ෂ සමඟ සාකච්ඡා කරමින් පුළුල් වූ සන්ධානයක් ගොඩනැඟීමට අපි සාකච්ඡා කළා.
පොදුජන එක්සත් පෙරමුණ ප්‍රමුඛ පැරණි සන්ධානය මේ රටේ දේශපාලනය තීරණාත්මක තැනකට අරන් ආ කඳවුරක්. පැරණි සන්ධානය නූතන යුගයට සරිලන පරිදි සකස් කර ගනිමින් ජනතා අභිලාෂ මුදුන් පමුණුවා ලීමට තීරණය කළා. ව්‍යවස්ථාව වෙනස් කරමින් නීතිමය තත්ත්වය සංශෝධනය කරමින් අපි අලුත් සන්ධානයක් ගොඩනැඟුවා. ශ්‍රී ලංකාවේ දේශපාලන පක්ෂ නිරන්තරයෙන් පක්ෂයේ නායකයාගේ ග්‍රහණයට හසු වූ නිසා ජනතාව වෙනුවෙන් හා පක්ෂය වෙනුවෙන් සිදුවිය යුතු ප්‍රජාතන්ත්‍රවාදී කැපකිරීම් මඟ හැරෙමින් තිබෙනවා. දේශපාලන පක්ෂවල නායකයන් පොදු ජනතාවගේ සාධාරණ අවශ්‍යතාවන් ග්‍රහණයට ගත් නිසා පක්ෂ දේශපාලනය විනාශ වුණා. උදාහරණයක් ලෙස ශ්‍රී ලංකා නිදහස් පක්ෂය පෙන්විය හැකියි.
ශ්‍රී ලංකා නිදහස් පක්ෂය නායකයා විසින් විනාශ කරද්දී දේශපාලනයට ප්‍රවේශ වීම සඳහා අනෙකුත් සාමාජිකයන්ට ප්‍රජාතන්ත්‍රවාදී සන්ධානයක් ගොඩනැඟීමට සිදු වුණා. පක්ෂයක් කෑලි‍වලට කැඩෙද්දි දේශපාලනය කළ නොහැකියි. පසුගිය කාලයේ ශ්‍රී ලංකා නිදහස් පක්ෂය පාර්ලිමේන්තුවේ විවිධ කණ්ඩායම්, දේශපාලන පක්ෂ සමඟ සාකච්ජා කළා. ජාති ආගම් බේද නොතකා සියලුම ජන කොට්ඨාසවලට ඒකාබද්ධ විය හැකි සන්ධානයක් ගොඩනැඟුවා. පාක්ෂිකයන් අපහසුතාවට පත් නොකර පුළුල් දේශපාලන නායකත්වයක් සමඟ පුළුල් ප්‍රජාතන්ත්‍රවාදී කතිකාවක් ගොඩනැඟීම මේ සන්ධානයේ ප්‍රධාන අරමුණයි. අපි සමඟ සියලු දෙනාට එක්විය හැකියි. ශ්‍රී ලංකා නිදහස් පක්ෂයට සියයට 25ක් අනෙක් සියල්ලන්ටම සියයට 75ක් වන පරිදි ප්‍රජාතන්ත්‍රවාදී අවකාශයක් අපි මේ සන්ධානයේ සකස් කළා.
අපි දීර්ඝ වශයෙන් සාකච්ජා කළා. ප්‍රජාතන්ත්‍රවාදී ව්‍යුහයක් අප සතු වූ බැවින් මෙරට දේශපාලන පක්ෂවල නායකයන් සියලු දෙනාම අපි සමඟ එකතු වෙනවා. ආර්ථික, දේශපාලන, විදේශ ප්‍රතිපත්ති ආදි සියලුම කේෂ්ත්‍ර පිළිබඳ තීන්දු ජනතාව හමුවට පැමිණෙන්නේ නායකත්වයේ මණ්ඩලයේ සාකච්ජාවකින් පසුවයි. ඕනෑම තරාතිරමක අයෙකුට අපේ දේශපාලන කඳවුරේ ඉහළටම යා හැකි ආකාරයේ ප්‍රජාතන්ත්‍රවාදයක් සුරක්ෂිත කර තිබෙනවා. පුරුදු දේශපාලනය අවසන් කරමින් ආර්ථිකය ශක්තිමත් තැනකට ඔසවා තබමින් අපි මේ මොහොතේ රනිල් වික්‍රමසිංහ මහතාට ලබා දිය යුතුයි තීරණය කළා.
ඒ වගේම මේ රටින් පවුල් දේශපාලනය අවසන් කළ යුතුයි. පවුල් දේශපාලනයෙන් ආර්ථික හා දේශපාලන දේහයට වූ විනාශය අති විශාලයි. ඒ නිසා අපට පවුල් රැකීමේ අවශ්‍යතාවක් නැහැ. පවුල් රකින්න, පවුල් හදන්න කලින් අපි හැමෝටම රටක් තිබිය යුතුයි. තාත්තාගෙන් පුතාට, පුතාගෙන් මුනුබුරාට දේශපාලනය පැවරෙන ක්‍රමය අවසන් කළ යුතුයි. පොදුජන එක්සත් පෙරමුණ යනු ජනතා අවශ්‍යතා පදනම් කර ගනිමින් බිහිවූ සන්ධානයක්. තෙල් බෙහෙත් වෙළෙන්දො වගේ ඇවිත් බොරු කතා බොරු පොරොන්දු දෙන්න අවශ්‍යතාවක් අපට නැහැ.”
පොදුජන එක්සත් පෙරමුණේ නායක අනුර ප්‍රියදර්ශන යාපා මහතා –
“අපි පසුගිය කාලයේ විශාල කාලයක් වෙන් කළා. අලුත් දේශපාලන වැඩපිළිවෙළක් වෙනුවෙන්. අපේ සන්ධානයේ විශේෂත්වය තමා නායකත්ව මණ්ඩලයකින් සියලු දෙනා සමඟම සාකච්ජා කිරීම. අපි ළඟ විශේෂත්වයක් තිබෙනවා. ප්‍රජාතන්ත්‍රවාදය වඩාත් පුළුල් ලෙස ක්‍රියාවට නැංවීම. මෙරට දේශපාලන ඉතිහාසයේ ශ්‍රි ලංකා නිදහස් පක්ෂයට උරුමයක් තිබෙනවා පොදුජන අයිතීන් සුරක්ෂිත කිරීම වෙනුවෙන්. අපි සියලු දෙනාම මේ මොහොතේ ඒ වෙනුවෙන් කැපවෙන බව ප්රකාශ කරන්න කැමැතියි. මම මොන සන්ධානයේ නායකත්වය දැරුවත් නිමල් ලාන්සා මහතා නොවන්නට මේ ආකාරයේ පුළුල් දේශපාලන සන්ධානයක් ගොඩනැඟීම අපහසුයි. එතුමාගේ අසීමිත කැපකිරීමට අපි සියලු දෙනාගේ ස්තූතිය පුද කර සිටිනවා. පසුගිය කාලයේ ආර්ථික කඩාවැටීමත් සමඟ අපිටම අවේණික වූ රටාවක් නිර්මාණය කර ගැනීමට අපට සිදුවුණා.
මෛත්‍රිපාල සිරිසේන මහතා පක්ෂයේ මෙන්ම අපේ රටේ ද අනාගතය බිඳ දැමූ නිසා අපේ ගමන් මඟ වෙනස් කළා. සිරිමාවෝ බණ්ඩාරනායක මැතිනියගෙන් ගොඩනැඟුණු ප්‍රජාතන්ත්‍රවාදී දේශපාලන ක්‍රියාවලිය නැවත වරක් සක්‍රිය කිරීමට අපේ කණ්ඩායමට හැකියාව තිබෙනවා. රාජ්‍යයේ අයිතිය සුරක්ෂිත කරමින් සියලු දෙනා එකතු කර ගනිමින් අපි අනාගතයේ බිඳවැටුණු රට ගොඩනැඟීමට සූදානම්. ඒ සඳහා ඉදිරි ජනාධිපතිවරණයේදී අපේ සන්ධානයේ සහයෝගය ලබාදීමට සූදානම් බව මේ මොහොතේ ඉතාමත් සතුටින් දැනුම්දීමට කැමැත්තෙමි.”
මෙහිදී පොදුජන එක්සත් පෙරමුණේ මහ ලේකම් රාජ්‍ය ඇමැති ලසන්ත අලගියවන්න මහතා විසින් නව නිලධාරි මණ්ඩලය හා නායකත්ව මණ්ඩලය සභාවට හඳුන්වා දීම ද සිදු කරන ලදී.
ඡායාරූප -දුෂ්මන්ත මායාදුන්නෙ
ස්වර්ණා විජේකෝන්
