දේශීය ණය ප්‍රතිව්‍යුහගත කිරීමේදී දේශීය මූල්‍ය ආයතනවල කඩා වැටීමක් සිදුනොවන බව කොළඹ විශ්වවිද්‍යාලයේ ආර්ථික විද්‍යා අධ්‍යයන අංශයේ මහාචාර්ය ප්‍රියංග දුනුසිංහ මහතා පැවසුවේය.

ඒ, මේ සම්බන්ධයෙන් අද (26) මාධ්‍ය වෙත අදහස් දක්වමිනි.

ලෝකයේ ණය අර්බූදයකට ලක්වූ රටවල් දේශීය ණය ප්‍රතිව්‍යුහගත කිරීම මගින් රජයේ ණය බර අඩුකර ගෙන තිබෙන බවයි දුනුසිංහ මහතා සඳහන් කළේ.

කෙසේවෙතත් සේවක අර්ථ සාධක අරමුදලෙන් ලබාගෙන තිබෙන ණය ප්‍රතිව්‍යුහගත නොකළ යුතු බවද ඔහු කියා සිටියේය,.

ආර්ථික අර්බුදය හේතුවෙන් සේවක අර්ථ සාධක අරමුදලේ ප්‍රතිලාභ 50% කින් අඩුවී තිබෙන අතර දේශීය ණය ප්‍රතිව්‍යුහගත කිරීමේදී සෙසු මූල්‍ය ආයතන වලින් ලබාගත් මුදල් පමණක් ප්‍රතිව්‍යුහගත කිරීම කළ යුතු වන බව හෙතෙම ප්‍රකාශ කරන ලදී.

ණය තිරසාර කිරීම ජාත්‍යන්තර මූල්‍ය අරමුදලේ කොන්දේසියක් වන බවයි මහාචාර්යවරයා කියාසිටියේ.

”මම හිතන්නේ නෑ දේශීය ණය ප්‍රතිව්‍යුහගත කිරීම මගින් දේශීය මූල්‍ය ආයතන කඩා වැටෙනවා කියලා. ලංකාවට හැකියාවක් තියෙනවා මූල්‍ය ආයතනවලට හානියක් නොවන ආකාරයට කරගන්න. විදේශිකයින් ගෙන් ණය කපාහැරීම කරනවා නම් සාධාරණයක් තියෙනවා දේශීය ණය ප්‍රතිව්‍යුහගත කිරීමත්. සේවක අර්තසාධක අරමුදල මගින් ලබාගත් ණය ප්‍රතිව්‍යුහගත කිරීම නොකළ යුතුයි. ආර්ථික අර්බුදය මත සේවක අර්ථ සාධක අරමුදලේ ප්‍රතිලාභ 50% කින් අඩුවෙලා. අනිත් මූල්‍ය ආයතන වලින් ලබාගත් මුදල් පමණක් ප්‍රතිව්‍යුහගත කිරීම කළ යුතුයි. රටේ ජනතාව යම් යම් ක්ෂේත්‍රවල ඇතිවෙලා තියෙන වේදනාව සමානව බෙදාගත යුතු වෙනවා. මේක කළේ නැත්නම් රජය අරගෙන තියෙන ඉහළ බදු ගෙවන්න තව බදු වැඩිකරගන්න වේවී. අපි තීරණයකරන්න ඕන වැඩිපුර බදු ගෙවනවද කියලා. මම දකින්නේ නෑ කිසිසේත් දේශීය ණය ප්‍රතිව්‍යුහගත කිරීම මගින් මූල්‍ය ආයතන කඩාවැටෙයි කියලා.”

එම ප්‍රතිව්‍යුහගත කිරීම සිදුවන්නේ මූල්‍ය ආයතනවලට දැරිය හැකිවන පරිදි බවද දුනුසිංහ මහතා සඳහන් කළේය.

ASK

LNW