ප්‍රතිත්‍රස්ත පනත රටේ පොදු ජනතාවගේ ආරක්ෂාවටයි – අධිකරණ ඇමති ඇමෙරිකානු තානාපතිනියට කියයි
ප්‍රතිත්‍රස්ත පනත් කෙටුම්පත ගෙන ඒමේ රජයේ අරමුණ මේ රටේ පොදු ජනතාව ආරක්ෂා කිරීමට බව අධිකරණ අමාත්‍ය විජයදාස රාජපක්ෂ මහතා පවසයි.
ඇමතිවරයා මේ බව කියා සිටියේ අධිකරණ අමාත්‍යාංශයේදී අද(20) ශ්‍රී ලංකාවේ අමෙරිකා තානාපතිනී ජුලී චන්ග් මහත්මිය හමුවූ අවස්ථාවේ දී ය.
රජය විසින් පාර්ලිමේන්තුවට ඉදිරිපත් කිරීමට නියමිත නව ප්‍රති ත්‍රස්ත පනත් කෙටුම්පත පිළිබදව හා මේ වන විට ශ්‍රී ලංකාව විසින් අත් කර ගෙන ඇති ආර්ථික ප්‍රගතිය ඇතුළු කරුණු සම්බන්ධයෙන් අධිකරණ අමාත්‍යතුමා විසින් තානාපතිනිය දැනුවත් කළේය.
දැනට පවතින ත්‍රස්තවාදය වැළැක්වීමේ පනත වෙනුවට ප්‍රතිත්‍රස්ත පනත් කෙටුම්පත ගෙන ඒමේ රජයේ අරමුණු වුයේ රටේ සාමාන්‍ය ජනතාවගේ ආරක්ෂාව සුරක්ෂිත කිරීම බවත්, මානව හිම්කම් කඩවීමට ඇති අවස්ථාවන් නව ප්‍රතිත්‍රස්ත පනත් කෙටුම්පත මගින් අවම කර ඇති බවත්, අධිකරණ අමාත්‍යතුමා මෙහිදී පැවසීය.
වත්මන් රජය විසින් මේ වන විට ජනතාවගේ ආරක්ෂාව ආර්ථික තත්වය නගා සිටුවීම වෙනුවෙන් ගෙන ඇති වැඩ පිළිවෙළ අගය කරන අතර, ආර්ථික අර්බුදය සදහා මුහුණ දුන් ලෝකයේ සෙසු රටවල් පිළිබදව සළකා බැලීමේදී මේ තරම් කෙටි කාලයක් තුළ ආර්ථික අර්බුදයෙන් ගොඩඒමට කටයුතු කිරීම පිළිබදව සිය සතුට පළ කරන බව ද තානාපතිනීය මෙහිදී සදහන් කළාය.
මේ අතර අමාත්‍ය විජයදාස රාජපක්ෂ මහතා සහ ශ්‍රී ලංකාවේ දකුණු අප්‍රිකානු මහ කොමසාරිස් එස්.ඊ. ස්චල්ක් (S.E.Schalk) මහතා අතර හමුවක් ද අධිකරණ අමාත්‍යාංශයේදී අද පෙරවරුවේ පැවැත්විණි.
ජාතික සංහිදියාව වැඩි දියුණු කිරීම සදහා ශ්‍රී ලංකාවේ ස්ථාපිත කිරීමට නියමිත සංහිදියා කොමිසම පිහිටුවීම පිළිබදව හා එම කොමිසම පිහිටුවීම සදහා දකුණු අප්‍රිකාවේ අත් දැකීම් ලබා ගැනීම සදහා ශ්‍රී ලංකාව නියෝජනය කරමින් අධිකරණ අමාත්‍යතුමා ඇතුළු නියෝජිත පිරිස සිදු කළ සංචාරය සම්බන්ධයෙන් ද සාකච්ඡා විය.
ශ්‍රී ලංකාවේ සාමය හා සංහිදියා ක්‍රියාවලිය මෙන්ම ආර්ථික ස්ථාවරත්වය ඇති කිරීම වෙනුවෙන් දකුණු අප්‍රිකානු රජය අවශ්‍ය සහාය ලබාදීමට කැපවී කටයුතු කරන බව මහ කොමසාරිස්වරයා මෙහිදී සදහන් කලේය.