මෛත්‍රී, රනිල්, පොරොන්දු වූ දේ කර පව් නො දී ගෙදර යනු! – අජිත් පැරකුම් ජයසිංහ
2015 ජනවාරි 8 වෙනස තුළින් මේ රටේ ජනතාව මෛත්‍රීපාල සිරිසේන ජනාධිපති කළේත්, රනිල් වික්‍රමසිංහ අගමැති කළේත්, ඒ දෙන්නා මාාාාර මොළ දෙකක් හෝ සුපිරි වැඩකාරයන් දෙදෙනෙකු වන නිසා නො වේ. සරළව ම කියනවා නම්, මේ දෙන්නා වනාහි ගස් නැති රටෙන් අප සොයා ගත් තුත්තිරි ගස් දෙකක් පමණි.
අරටුව ඇති ගස් ලෙස නව ජීවයක් ලබන්නට අපි ඔවුන්ට අවස්ථාවක් ලබා දුන්නෙමු. එහෙත් කූඩැල්ලන් මෙට්ටයේ තබන්නට බැරි බව ඔවුන් විසින් ම ඔප්පු කර හමාර ය. දැන් සිදු වන්නේ එය නැවත නැවත ඔප්පු කිරීම පමණි.
අස්සයා පොකුණ අසලට රැගෙන යන්නට පුළුවන. වතුර පොවන්නට බැරි ය. බලය අරන් දෙන්නට පුළුවන. එහෙත්, මොළය දෙන්නට අපට බැරි ය. එසේ ම, මොළය තිබුණත් හොඳ ආකල්ප නැති අය මකලාවත් හදන්නට බැරි ය.
මෛත්‍රීපාල සිරිසේන හෝ රනිල් වික්‍රමසිංහ හෝ නැවත වතාවක් මේ රටේ රාජ්‍ය නායකත්වයට තෝරා ගත යුතු අය නො වන බව ඔවුහු පුරවැසි බලවේග හමුවේ ඔප්පු කරමින් සිටිති. මීළඟ ඡන්දයකදී ඔවුන්ට පුරවැසි සහයෝගය ලැබේ ද නැද්ද යන්න තීරණය කරනු ඇත්තේ ඔවුන්ගේ ධුර කාලය තුළ කාර්යසාධනය අනුවයි. මහින්ද රාජපක්ෂට සිටින ආකාරයේ ආගමික අන්ධභාවයකින් කඩේ යන මුග්ධ නඩයක් තමන්ට නැති බව මේ ඩබල තේරුම් ගත යුතු ය.
ඒ කාර්යසාධනය ගැන මේ ටික කිව යුතු ය. මේ දෙගොල්ල හා දූෂිත රාජ්‍ය සේවය එකතුව මහා පරිමාණ සොරුන්ට ගැලවී යන්නට දෙන ගමන් පඩ ෂෝ පමණක් පෙන්වන බව පෙනේ. ඒවායේ ද ඇත්තේ එකිනෙකාගේ ගේම් බව පෙනේ.
රනිල් වික්‍රමසිංහගේ කෙරුවාව ගැන ආසන්න ම හොඳ ම උදාහරණය බැසිල්ට අයත් යයි ප්‍රසිද්ධ වූ මල්වානේ මන්දිරය සහිත අක්කර 16 පොල් ඉඩම ගැන අධිකරණය දී ඇති තීන්දුවයි. මුදිත ජයකොඩිගේ නමින් ලියාපදිංචි කර ඇති මෙම ඉඩමට එම පුද්ගලයා හෝ බැසිල් රාජපක්ෂ හෝ අයිතිවාසිකම් නො ඉල්ලන බව ප්‍රකාශ කිරීමත් සමග එය වෙන්දේසි කිරීමට අධිකරණය තීන්දු කර තිබේ. එවැනි තීන්දුවකට අධිකරණය පැමිණෙන්නේ විමර්ශනයේ ගැටලු නිසා විය හැකි ය.
එය අපූරු තත්වයකි. සොරකම් කළ මහජන මුදලින් එක එකාගේ නමට අත්පත් කර ගත් දේපල අසු වූ පසු ඒවා මගේ නෙමෙයි කීමෙන් වගකීමෙන් ගැලවිය හැකි වීම අපූරු තත්වයකි. මේවාට ඔප්පු ලියන විට අත්සන් කළ අයවත් නැද්ද?
මේ ඉඩමේ සත්‍ය හිමිකරු යයි අනුමාන කෙරෙන, 2015 ජනවාරි 15 දක්වා එහි හිමිකරු වූ බැසිල්ගේ ළඟ ඥාතියකු වන තිරුකුමාර් නඩේසන්ගෙන් පොලිසිය ප්‍රශ්න කර හෝ නැත. ඔහු මේ වන විට සිටින්නේ රනිල් වික්‍රමසිංහගේ තුරුල්ලේ බව ප්‍රසිද්ධ ය.
මෛත්‍රීපාල සිරිසේන හා රනිල් වික්‍රමසිංහ යන නායකයන් දෙපොළ වටා ම සිටින්නේ ලෝකෝත්තර කපටින් පිරිසක් බව ඉතා පැහැදිලි ය. ෆේස්බුක් පිටුවෙන්, පවර්පොයින්ට් ප්‍රසන්ටේෂන් එකෙන් පවා ඔවුන් රවටා ගත්, තඹ දොයිතුවකට විශ්වාස කළ නො හැකි රාජපක්ෂ බැලයෝ ද ඒ අතර වෙති. තවත් එවුන් පල් හොරු ය. මේ වන විට බැසිල් කරපු සෙල්ලම ම හොර රහසේ අරලියගහ මන්දිරයේ සිදු වන බව ප්‍රසිද්ධ ය. තව බොහෝ අන්තේවාසිකයන් කරන්නේ කල දුටු කල තම තමන්ගේ කූඩයේ මට්ටමට වල ඉස ගැනීමයි. දේශපාලනය කරන අය අතිශය විරල ය.
අලුත් ම සෙල්ලම අගමැතිගේ වාර්තා කැඳවීම ය. හැම එකකට ම එයා වාර්තාවක් කැඳවනවා ය. අර්ජුන් මහේන්ද්‍රන්ගේ පවුලට සම්බන්ධ යයි කියන පර්පෙචුවල් ට්‍රෙෂරීස් සමාගම හිටිහැටියේ විශ්වාස නො කළ හැකි තරමේ අධික ලාභයක් වාර්තා කිරීම ගැන ද දැන් වාර්තාවක් කැඳවා තිබේ. වාර්තා ගැන කියන්නට තිබෙන්නේ… (එක්කො ඕනැ නැහැ ය.)
අපි මෙම ආණ්ඩුවෙන් බලාපොරොත්තු වන්නේ එක ම එක දෙයක් පමණි. එනම්, මේ මොහොතට අදාළව පොරොන්දු වූ ප්‍රජාතාන්ත්‍රික ප්‍රතිසංස්කරණ සිදු කරමින් යළි රාජපක්ෂ පන්නයේ ව්‍යවස්ථානුකූල, ප්‍රජාතන්ත්‍ර විරෝධී ඒකාධිපතිත්වයක් බිහි වීමට ඇති ඉඩකඩ අවුරා දැමීම හා ආර්ථිකය කඩා වැටීම වැළැක්වීමට අත්‍යවශ්‍ය ප්‍රතිසංස්කරණ සිදු කිරීමයි. රාජ්‍ය සේවය සම්බන්ධයෙන් බරපතල ගැටලු තිබේ. රාජ්‍ය සේවය දේශපාලනය තරම්වත් මහජනතාවට වගවීමක් නැත. එහෙත්, ස්වාධීන කොමිෂන් සභා ගැන කතා කරන්නට තරම් පාරිශුද්ධත්වයක් මෛත්‍රී හෝ රනිල් හෝ පෙන්වා නැත.
මහින්ද පසුපස යන මෝඩ බයියන් වැනි බලවේගයක් හදාගන්නට අවශ්‍ය තරම් ආත්මරාගී හෙවත් නාසිසිස්ට් ඉතිහාසයක් මෛත්‍රීපාලට හෝ රනිල්ට හෝ නැත. එසේම, තනියෙන් හා තමන්ගේ සමීප හිතවතුන් සමග පමණක් අනාගෙන කන ප්‍රතිපත්තිය නිසා ආර්ථික හේතු මත හෝ ඔවුන් පසුපස යන්නට උදේනි අතුකෝරළලා නැති බව මතක් කර දිය යුතු ය.
මේ ආණ්ඩුව බලයට ගෙන ආ පුරවැසි බලවේගය වෙනුවෙන් අපට කීමට ඇත්තේ මෙයයි.
අප විසින් බලයට ගෙන එන ලද ආණ්ඩුවේ ජනවරම ඇති ධුර කාලය තුළ අපි ඔබට සහයෝගය දෙන්නෙමු. ඒ සහයෝගයේ සීමාව ඇත්තේ සොරුන්ට ආණ්ඩු පෙරළීමට ඉඩ නො දීමේ සලකුණ දක්වා පමණක් බව තේරුම් ගැනීම ඔබගේ යහපතට හේතු වනු ඇත.
ඔබේ මෝඩ අහංකාරකම් ඔබට ය. ඒවා සත පහකට ගණන් ගන්නේ නැති මිනිසුන් ද 2015 ජනවාරි 8 වෙනසට උර දුන් පුළුල් ජන බලවේගය තුළ සිටින බව මතක් කර දිය යුතුව තිබේ. ඔවුන් අද මෙන් ම හෙටත් රනිල්, මෛත්‍රී හෝ මහින්ද හෝ ළඟ දන නො නමන බව මතක තබා ගන්න.
අවසන් වශයෙන් කියන්නට ඇත්තේ මෙපමණි.
අප ඔබට සහයෝගය දක්වන්නේ නිවටකම නිසා යයි නො සිතන්න.
පොරොන්දු වූ දේ කර පව් නො දී ගෙදර යනු!
