උද්ධමනය සියයට 12 දක්වා ඉහළට – වසර 13 කට පසු ඉහළ ම අගය
කොළඹ පාරිභෝගික මිල දර්ශකය අනුව දෙසැම්බර් මාසයේ මෙරට උද්ධමනය සියයට 12.1 දක්වා ඉහළ ගොස් ඇති බව ශ්‍රී ලංකා මහ බැංකුව නිවේදනය කොට ඇත.
ආර්ථික නිරීකෂ්කයින් කියන්නේ මෙය වසර 13 කට පසු වාර්තා වී ඇති ඉහළ ම අගය බවයි. එමෙන් ම ආහාර මිල උද්ධමනය සියයට 22 ඉක්මවා ගොස් ඇති බව ද වාර්තා වී තිබේ.
මෙම උද්ධමනයට මහා බැකුව විවිධ හේතු දැක්වුව ද බොහෝ ආර්ථික විශේෂඥයන් කියන්නේ මෙයට මුලික හේතුව මහ බැංකුව විශාල ලෙස මුදල් නෝට්ටු මුද්‍රණය කිරීම බවයි.
පසුගිය වසර දෙකේ දී අලුතින් ට්‍රිලියන තුනක ( බොලියන 3000 ක ) මුදල් නෝට්ටු මුද්‍රණය කොට ඇති මහ බැංකුව 2021 වසරේ දෙසැම්බර් වන විට නිකුත් කොට තිබු මුදල් ප්‍රමාණය බිලියන 945 කි
උද්ධමනය ගැන මහ බැංකුව නිකුත් කොට ඇති නිවේදනය පහත දැක්වෙයි.
2021 දෙසැම්බර් මස උද්ධමනය – කො.පා.මි.ද.
කොළඹ පාරිභෝගික මිල දර්ශකයෙහි (කො.පා.මි.ද., 2013=100) වාර්ෂික ලක්ෂ්‍යමය වෙනස මගින් මනිනු ලබන මතුපිට උද්ධමනය, 2021 නොවැම්බර් මාසයේ පැවති සියයට 9.9හි සිට 2021 දෙසැම්බර් මාසයේ දී සියයට 12.1 දක්වා ඉහළ ගියේය. මේ අතර, වාර්ෂික සාමාන්‍ය පදනම මත මනිනු ලබන කො.පා.මි. දර්ශකයෙහි වෙනස, 2021 නොවැම්බර් මාසයේ පැවති සියයට 5.3හි සිට 2021 දෙසැම්බර් මාසයේ දී සියයට 6.0 දක්වා ඉහළ ගියේය. ගැඹුරු විශ්ලේෂණයකින් අනතුරුව පෙනී යන්නේ වත්මන් උද්ධමනය සදහා ප්‍රධාන වශයෙන් සැපයුම් අංශයේ සාධක බලපා ඇති බවයි. මේ සම්බන්ධයෙන් සවිස්තරාත්මක පැහැදිලි කිරීමක් ඉතා ඉක්මනින් ශ්‍රී ලංකා මහ බැංකුව මගින් ප්‍රකාශයට පත් කරනු ඇත.
උද්ධමනය සඳහා ආහාර සහ ආහාර නොවන කාණ්ඩ දෙකෙහිම අයිතමවල මිල ගණන්හි සිදු වූ මාසික ඉහළ යෑම් හේතු විය. ඒ අනුව, ආහාර කාණ්ඩයෙහි වාර්ෂික ලක්ෂ්‍යමය උද්ධමනය 2021 නොවැම්බර් මාසයේ පැවති සියයට 17.5හි සිට 2021 දෙසැම්බර් මාසයේ දී සියයට 22.1 දක්වා ඉහළ ගිය අතර, ආහාර නොවන කාණ්ඩයෙහි වාර්ෂික ලක්ෂ්‍යමය උද්ධමනය 2021 නොවැම්බර් මාසයේ පැවති සියයට 6.4හි සිට 2021 දෙසැම්බර් මාසයේ දී සියයට 7.5 දක්වා ඉහළ ගියේය.
Image – lankadeepa