මන්ත්‍රී ධූරයක් අහෝසි කළ ඓතිහාසික නඩු තීන්දුව තොරතුරු පනත නිසා ලැබූ ජයග්‍රහණයක් – නිදහස් මාධ්‍ය ව්‍යාපාරය
ඡන්දදායකයන්ට අල්ලස් දීම නිසා ප්‍රදේශී සභා මන්ත්‍රීවරයකුගේ තනතුර අහිමි කරමින් මොනරාගල මහාධිකරණය දුන් නඩු තීන්දුව තොරතුරු දැනගැනීමේ පනත නිසා ලැබුණු ජයග්‍රහණයක් බව නිදහස් මාධ්‍ය ව්‍යාපාරය නිවේදනයක් නිකුත් කරමින් ප්‍රකාශ කරයි.
එම නිවේදනයේ මෙසේ ද සඳහන් ය.
සැප්තැම්බර් 28 දිනට යෙදී ඇති තොරතුරුවලට ප්‍රවේශවීමේ ජාත්‍යන්තර දිනය නිමිත්තෙන් නිදහස් මාධ්‍ය ව්‍යාපාරය විසින් සංවිධානය කරනු ලැබූ මහජන සංවාදය සැප්තැම්බර් 25 සෙනසුරාදා දින පස්වරු 6.00 ට සූම් තාක්ෂණය ඔස්සේ මාර්ගගතව පවත්වන ලදී.
තොරතුරු දැනගැනීමේ පනත භාවිතා කරමින් ජය ගත් මොනරාගල මැතිවරණ නඩුව ප්‍රධාන කොට ගෙන පැවැත්වූ මෙම මහජන සංවාදයේ දේශකයින් ලෙස පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි, කොළඹ විශ්ව විද්‍යාලයේ සමාජ විද්‍යා අංශයේ ජ්‍යෙෂ්ඨ කතිකාචාර්ය ආචාර්ය එම්. ටී. එම් මහීස්, මහනුවර සමාජ සංවර්ධන ආයතනයේ ව්‍යාපෘති කළමනාකාරිනී යෝගොෂ්වරී ක්‍රිෂ්ණන් සහ කන්තලේ ජාතික සහයෝගිතා සංවර්ධන පදනමේ ව්‍යාපෘති කළමනාකරු සුරංග රූපසිංහ යන අය සහභාගී වූහ.
තොරතුරු පනත භාවිතා කරමින් ලබාගත් දත්ත හා තොරතුරු ඔස්සේ, මැතිවරණ අල්ලස් සම්බන්ධයෙන් පැවරූ නඩුවකින් ලබා ගත් ඓතිහාසික නඩු තීන්දුව පිළිබඳ අත්දැකීම ගැන අදහස් දක්වමින් රෝහණ හෙට්ටිආරචිචි මහතා ප්‍රකාශ කළේ, 2018 වර්ෂයේ මොනරාගල මඳුරකැළේ පොදුජන පෙරමුණේ අපේක්ෂක විසින් ඡන්ද දායකයන්ට අල්ලස් ලබා දී ඇති බවට වාර්තා වීමෙන් පසු, පැෆරල් සංවිධානය, මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානයේ ද සහාය ඇතිව ගොනු කරනු ලැබූ නඩුකරයෙන් ඓතිහාසික තීන්දුවක් ලැබී ඇති බවයි, 2021 සැප්තැම්බර් 13 දා මොනරාගල මහාධිකරණ විනිසුරු විසින් ලබා දුන් එම සුවිශේෂි තීන්දුවට අනුව මොනරාගල ප්‍රාදේශීය සභා මන්ත්‍රිවරයාගේ මන්ත්‍රී ධුරය අහෝසි කර ඇත. තවද එකී ජයග්‍රහණය තොරතුරු දැන ගැනීමේ පනත භාවිතා කරමින් මැතිවරණ දූෂණ සම්බන්ධයෙන් ලැබූ ප්‍රථම ජයග්‍රහණය බව ද ඔහු පැවසුවේය.
“පුරවැසි සමාජයට පාඩම් උගත හැක්කේ කෙසේද” යන තේමාව යටතේ අදහස් දැක්වූ ආචාර්ය එම්.ටී.එම් මහීශ් මහතා ප්‍රකාශ කළේ, සාමාන්‍ය පුරවැසියාට තම එදිනෙදා ජීවිතයේ සිදුවන සිද්ධීන් පිළිබදව තොරතුරු දැනගැනීමේ අයිතියක් ඇති නමුත් යම් යම් මාධ්‍ය ආයතන මගින් තොරතුරු විකෘති කරමින් පුරවැසියා වෙත ඒවා මුදාහරින නිසා පුරවැසියාට නිවැරදි තොරතුරු ලබා ගැනීමට නම් තොරතුරු පනත භාවිතා කරමින් තොරතුරු ලබා ගත හැකි බවයි.
තොරතුරු පනත භාවිත කිරීමේදී කඳුකර ජනතාව මුහුණ දෙන අභියෝග සහ ජයග්‍රහණ ගැන යෝගේෂ්වරී ක්‍රිෂ්ණන් අදහස් දැක්වූ අතර ග්‍රාමීය ජනතාවගේ ගැටළු සම්බන්ධව පැනනගින ගැටළු වලට තෝරතුරු දැනගැනීමේ පනත භාවිතා කරන විට උද්ගත වන අභියෝග සම්බන්ධව සුරංග රූපසිංහ මහතා අදහස් දක්වන ලදී.
-
නිදහස් මාධ්‍ය ව්‍යාපාරය-