රතු වරෙන්තු ලත් උදයංග වී‍රතුංග ඩුබායි ” එළිය” සම්මන්ත්‍රණයෙන් මතු වේ.

යුද මෙහෙයුම් සඳහා මිග් ප්‍රහාරක යානා 4ක් මිලදී ගැනීම සහ තවත් යානා 4ක් සම්බන්ධව අමෙරිකානු ඩොලර් මිලියන 7ක වංචාවක් සම්බන්ධයෙන් පොලිස් මූල්‍ය අපරාධ පරීක්ෂණ දෙපාර්තමේන්තුව සිදු කළ පරීක්ෂණවලට අදාළව සැකකරුවෙකු ලෙස නම් කර මේවනවිට ශ්‍රී ලංකා අධිකරණයෙන් රතු වරෙන්තු නිකුත්කර ඇති උදයංග වීරතුංග ඊයේ(02) ඩුබායිහී පැවැති එළිය සම්න්ත්‍රණයේදී නැවත කරලියට පැමිණ තිබේ.  ඔහු ඩුබායිහී ඉතා නිදහසේ සැරිසරමින් ගෝඨාභය රාජපක්ෂ මහතාගේ එළිය වැඩසටහන සංවිධාන කරමින් සිටින ආකාරය ඊයේ(02) දකින්නට ලැබුනි.

මැදගොඩ අභයතිස්ස හිමි සහ හිටපු මහබැංකු අධිපති අජිත් නිවාඩ් කබ්රාල් මහතා සහභාගි වූ ඩුබායි බ්ලූ රෙඩිෂන් හෝටල් ශාලාවක පැවති එම සමුළුවට 40-50 අතර පිරිසකගේ සහභාගිත්වයක් දකින්නට ලබුනි. ඩුබායි වෙසෙන ශ්‍රී ලාංකිකයන් ප්‍රමාණය අනුව එය සංවිධායකයින් කිසිසේත් අපෙක්ෂා නොකල තරම් අඩු ජන සහභාගිත්වයක් වීමද මෙහිදී කැපී පෙනුනි.

මිග් යානා ගනුදෙනුවේදී ප්‍රහාරක ගුවන් යානා අලෙවිකරු මෙරට විමර්ශන නිලධාරීන්ට පවසා ඇත්තේ, එම යානා සඳහා ඔවුන්ට ලැබුණේ, ඩොලර් මිලියන 7ක මුදලක් පමණක් බව ය. කෙසේ වෙතත් ශ්‍රී ලංකා ගුවන් හමුදාව ඔවුන්ගේ ලංකා බැංකු ගිණුම හරහා මෙම ප්‍රහාරක ගුවන් යානා සඳහා ඩොලර් මිලියන 14ක් ගෙවා ඇත.

එය අනුමත කර ඇත්තේ හිටපු ආරක්ෂක ලේකම් ගෝඨාභය රාජපක්ෂ මහතා බවත් උදයංග වීරතුංග මහතා අතරමැදියෙකු ලෙස කටයුතු කර ඇති බවත් ආරංචි මාර්ග සඳහන් කරයි. මීට අදාළ ගිවිසුම සඳහා ශ්‍රී ලංකා ගුවන් හමුදාව, අලෙවිකරු සහ නියෝජිතයින් අත්සන් තබා ඇත්තේ ගුවන් හමුදා මූලස්ථානයේදී සහ උදයංග වීරතුංග තානාපතිවරයෙකු ලෙස කටයුතු කළ නිල නිවසේදී ය.

රුසියාවේ ශ්‍රී ලංකා තානාපති කාර්යාලයේ සේවය කළ සේවකයෙකුගේ හදිසි මරණය සම්බන්ධයෙන් සිදු කරණ පරීක්ෂණ සඳහාද උදයංග වීරතුංග මහතා අත්‍යාවශ්‍ය පුද්ගලයෙකි.