“ඇමති තනතුරු යලිත් භාර ගන්න” මහින්ද මුස්ලිම් මන්ත්‍රීවරුන් ගෙන් ඉල්ලයි.
ආණ්ඩුවේ කැබිනට්, රාජ්‍ය සහ නියෝජ්‍ය ඇමැති ධුරවලින් ඉවත් වූ මුස්ලිම් මන්ත්‍රීවරු පිරිසක් අද (08) පෙරවරුවේ විපක්ෂ නායක කාර්යාලයේදී මහින්ද රාජපක්ෂ මහතා හමුවූහ.
රවුෆ් හකීම්, රිෂාඩ් බදියුර්දීන්, ඒ.ටී.එම්. ෆවුසි යන මහත්වරුන් ඇතුළු මුස්ලිම් මන්ත්‍රීවරු 7 දෙනෙක්ද, මහාචාර්ය ජී.එල්. පීරිස් හා මන්ත්‍රීවරුන් වන බන්දුල ගුණවර්ධන සහ කෙහෙලිය රඹුක්වැල්ල යන මහත්වරුද මෙම සාකච්ඡාවට සහභාගි වූහ.
එහිදී අදහස් දක්වා ඇති විපක්ෂ නායක මහින්ද රාජපක්ෂ මහතා මුස්ලිම් අමාත්‍යවරුන් ආණ්ඩුවේ තනතුරුවලින් එකවරම ඉවත්වීම තමා කිසිසේත් අනුමත නොකරන බව ප්‍රකාශ කර ඇත.
ජනවාර්ගික වශයෙන් නොබෙදී අන්තවාදය තුරන් කිරීමට සියලුදෙනා එක්ව කටයුතු කළයුතු බවද මහින්ද රාජපක්ෂ මහතා පැවසීය. මෙම සාකච්ඡාවට සහභාගී වූ මුස්ලිම් මන්ත්‍රීවරුන් ප්‍රකාශ කර ඇත්තේ මුස්ලිම් ජනතාවගේ ආරක්ෂාව සම්බන්ධයෙන් ගැටළුවක් මතුවී ඇති බැවින් තමන් ආණ්ඩුවේ තනතුරුවලින් ඉවත් වූ බවයි. අන්තවාදයට තමන් විරුද්ධ බව ප්‍රකාශ කරඇති එම මන්ත්‍රීවරුන් සියලුම දෙනා එක්ව ජීවත්වන සමාජයක් බිහිකිරීම තම අපේක්ෂාව බවද සඳහන් කර ඇත.