ජනපති සිදුකළ කුමන්ත්‍රණය පිළිකාවක් මෙන් වර්ධනය වෙලා – සාධාරණ සමාජයක් සඳහා වූ ජාතික ව්‍යාපාරයේ කැඳවුම්කරු මහාචාර්ය සරත් විජේසූරිය
ජනාධිපතිවරයා විසින් පසුගිය 26 වැනිදා සිදුකළ කුමන්ත්‍රණය අද වනවිට පිළිකාවක් මෙන් ඉතාම බරපතල ලෙස වර්ධනය වෙමින් ඇතැයි සාධාරණ සමාජයක් සඳහා වූ ජාතික ව්‍යාපාරයේ කැඳවුම්කරු මහාචාර්ය සරත් විජේසූරිය මහතා ප්‍රජාතන්ත්‍රවාදය හා ව්‍යවස්ථාව රැකගැනීමේ අඛණ්ඩ සත්‍යග්‍රහයට කොළඹදී අද (21) එක්වෙමින් පැවැසීය.
ව්‍යවස්ථාව කුණුකූඩයට දමා නොමනා අශිෂ්ට පාලනයක් ගෙනයාමට ජනාධිපතිවරයා දරන මේ ප්‍රයත්නයට විරුද්ධව සියලු පුරවැසියන් මහමගට බැස විරෝධතාවය පළකළ යුතු බවද ඔහු සඳහන් කළේය.
එහිදී වැඩිදුරටත් අදහස් දැක්වූ මහාචාර්ය සරත් විජේසූරිය මහතා මෙසේද කීවේය.
‘‘ප්‍රජාතන්ත්‍රවාදයෙන් රට පාලනය කිරීමට පැමිණි මෛත්‍රීපාල සිරිසේන මහතා වෛරී පාලනයකට නායකත්වය දෙන්න තරම් සාහසික වෙලා තියෙනවා. මෛත්‍රීපාල සිරිසේන මහතා තමන්ට ලැබුණු ජනවරමට මේ වනවිට පිටුපාල තියෙනවා. ඔහුට දැන් ජනවරමක් නැහැ.
ඔහුට ඡන්දය දුන් හැටදෙලක්ෂයකට අධික ජනතාව වලපල්ලට යවන තරමට සාහසික තීරණයක් ඔහු 26 වැනිදා අරගත්තා. තමන්ගේ පරම හතුරා සමඟ එක්ව ව්‍යවස්ථාව කුණුකූඩයට දාලා නොමනා අශිෂ්ට පාලනයක් ගෙනයාමට දරන මේ ප්‍රයත්නයට විරුද්ධව සියලු පුරවැසියන් මහමගට බැහැලා විරෝධතාවය පළකරන්න අවශ්‍යයි.
මේ නැතිකරන්න හදන්නේ අපේ රට ,දරුවන්ගේ අනාගතය, ප්‍රජාතන්ත්‍රවාදය, ජීවත්වීමේ අයිතිය සහ මානව හිමිකම් තමයි මේ නැති කරන්න හදන්නේ. අද මේ ආරම්භ කරන සත්‍යග්‍රහයෙන් මෛත්‍රීපාල සිරිසේන ජනාධිපතිට අපි සංඥාවක් ලබාදෙනවා.
එතුමා පන්සල් යන පුද්ගලයෙක් හැටියට තමන් අදහන ආගමට අල්ප්‍රමාත්‍ර වූ ගෞරවයක් තියෙනවනම් මල් පහන් පූජා කරලා තමන්ට ප්‍රඥාව පහල වේවා කියලා ප්‍රාර්ථනා කරලා මේ රට අරාජික කිරීමේන් වළක්වන්න කියලා මේ අවස්ථාවේ අපි ආයාචනා කරනවා” යැයිද ඔහු එහිදී පැවැසීය.
නිමල කොඩිතුවක්කු – ලංකාදීප
