වෙල්ගමගේ හෙළිදරව්ව – සී.ජේ.අමරතුංග
මහින්ද රාජපක්ෂ මහතාගේ දේශපාලන ගේම් ගැන දන්නා උදවිය නම් කියන්නේ, ජනාධිපතිවරණය දිනන්නට ඔහුට නම් කිසිම වුවමනාවක් නැති බවය. ඒ තමන්ගේ පැත්තෙන් නාමල් හැර වෙන කවුරු ජනාධිපතිවරණයට ආවත් එය නාමල් රාජපක්ෂගේ දේශපාලන අනාගතයට අයහපත් ලෙස බලපාන නිසාය. මේ මොහොතේ මහින්දට අවශ්‍ය වන්නේ ඊළඟ මහ මැතිවරණයකින් නාමල් රාජපක්ෂ විපක්ෂ නායකයා කරන්නට පමණය. නාමල් කුමාරයා ඔටුන්න හිමි කුමාරයා වන්නෙ එවිටය. ඒ නිසා මහින්දට ඕනෑ පරදින අපේක්ෂකයෙකි.
ඒකාබද්ධ විපක්ෂයේ මන්ත්‍රීවරුන් කිහිපදෙනකු කුමාර වෙල්ගම මන්ත්‍රීවරයාට ප්‍රහාර එල්ල කිරීමත් එයට වෙල්ගමගේ ප්‍රතිචාරයත් තුළින් ඔවුන්ගේ දේශපාලනයේ අරමුණු මෙන්ම අනාගතය ගැනද බොහෝදේ හෙළිදරව් වී තිබේ. මහනුවර පැවැති රැස්වීමකදී මහින්දානන්ද අලුත්ගමගේ, දිලුම් අමුණුගම, ලොහාන් රත්වත්තේ, කෙහෙලිය රඹුක්වැල්ල ආදින් වෙල්ගමට ප්‍රහාරයක් එල්ල කළේ ජනාධිපතිවරණයේ අපේක්ෂකයා ලෙස ගෝඨාභය රාජපක්ෂ මහතා ඉදිරිපත් කිරීමේ යෝජනාවට විරුද්ධවීම නිසාය. එහිදී කියවුණේ වෙල්ගම පක්ෂය භේදකරන බව හා එජාපයට කඩේ යන බවකි. වෙල්ගමට ගෝඨා භයක් ඇතිවී තිබෙන බවද කියැවුණි. මේ කතා කීවේ මහින්ද රාජපක්ෂ මහතා වේදිකාවේ සිටියදී වීමද වැදගත්ය. එම ප්‍රහාරයෙන් පසුව මහින්ද රාජපක්ෂ මහතා වෙල්ගමට කියා ඇත්තේ සමාදාන වන ලෙසය. ඔහුගේ ප්‍රතිචාරය වූයේ සමාදාන වන්නේ උත්තර දීමෙන් පසුව බවයි. පසුගියදා වෙල්ගම දුන්නේ එම උත්තරයයි. බොහෝ කතන්දර එළියට ආවේ එම පිළිතුරත් සමඟය.
කුමාර වෙල්ගම මහතාගේ ප්‍රකාශයට අනුව මෙම විරසකයට එක් ප්‍රධාන හේතුවක් නම් ඒකාබද්ධය භාරකාර ආණ්ඩුවක් සෑදීමට දැරූ උත්සාහයට ඔහු විරුද්ධවීමය. එහිදී භාරකාර ආණ්ඩු හැදීමේ උත්සාහය පිටුපස තිබෙන කාරණාද එළියට ඇදිනි. එකක් නම් දිගින්දිගට බොරු කියා ජනතාව රවටා තිබීමය. එනම් හෙට බලය ගන්නවා, තව පෝයකින් ගන්නවා, දෙකකින් ගන්නවා ආදී වශයෙනි. එලෙස දිගටම ජනතාව රවටා ඇති නිසා කොහොම හරි බලය ගැනීමට ජනාධිපතිතුමා සමඟ භාරකාර ආණ්ඩුවක්වත් හදාගැනීම එම උත්සාහයයි. වෙල්ගම කියා ඇත්තේ එහෙම කරනවානම් තමා සහය දෙන නමුත් පසුව විපක්ෂයේ වාඩිවන බවය. එලෙස භාරකාර ආණ්ඩුවකට විරුද්ධවීම මෙම විරසකයට එක් හේතුවකි.
භාරකාර ආණ්ඩුව වතුරේ යාම
භාරකාර ආණ්ඩුව හබක්වීමේ හේතුවක්ද එහිදී හෙළිදරව් වී ඇත. එනම් මෛත්‍රීපාල සිරිසේන ජනාධිපතිවරයා සමඟ සිටින මන්ත්‍රීවරු විසිතුන්දෙනාගෙන් මෙයට කැමැත්ත දී ඇත්තේ තුන්දෙනකු පමණක් වීමය. විස්සක් හිටියේ එජාපයත් සමඟ බව වෙල්ගම මහතා හෙළිකළේය. එවිට එම දෙපාර්ශ්වයේ එකතුව එකසිය විසි හතකි. ඒකාබද්ධයට ඉන්නේ හැත්තෑවකි. භාරකාර ආණ්ඩුවක් හැදීමට එකසිය දහතුනක් අවශ්‍ය ය. වෙල්ගම මහතා ප්‍රශ්න කළේ එම සංඛ්‍යාව පෙන්නන්නේ කොහොමද කියාය. භාරකාර ආණ්ඩු හදන උත්සාහය අත්හරින්නට ඒකාබද්ධයට සිදුවන්නේ ඒ නිසාය. ඇත්ත කතාව ඒකය.
අද වීරයන් වී සිටින ඇතැමුන්ට එදා මහින්දගේ වේදිකාවට ගොඩවන්නට කොන්ද පණ නොතිබූ අන්දම කී වෙල්ගම මන්ත්‍රීවරයා ඇතැමුන් ඇමැතිකම් ඉල්ලාගෙන අගමැති රනිල් වික්‍රමසිංහ මහතා හමුවේ වැඳවැටුණු ආකාරයද හෙළිදරව් කළේය. එයින් කියැවෙන්නේ මොවුන් අතර බොහෝදෙනකුට ජනතාවාදී දේශපාලනයක් හෝ කිසිම දේශපාලන දැක්මක් හෝ ප්‍රතිපත්තියක් හෝ නැති බවය. එකම වුවමනාව ඇමැතිකම් ලබාගැනීමය. ඒ කුමකටද යන්න ගැනද අමුතුවෙන් කිවයුතු නැත.
අත් දෙකේම ලේ තවරාගත් උදවිය ගැනද කුමාර වෙල්ගම මහතා හෙළි කළේය. නීතියෙන් ගැලවුණත් කළ වරද කුමක්ද කියා ඔහු පෙන්වාදුන්නේ වීරයන් වී සිටින උදවියගේ තරම පෙන්නුම් කරමිනි. වෙල්ගම මන්ත්‍රීවරයා විවේචනය කළ තවත් අය ගැනද ඔහු එළෙසම හෙළිදරව් කොට තිබිණි.
ආණ්ඩු හදන්නට තදියම්වීමේ ඇත්ත හේතුවද වෙල්ගම හෙළිකළේය. ඒ සියලු දෙනාට නඩු තිබීමය. තමන්ටත් නඩු තුනක් තියෙන බව වෙල්ගම කීවේ ඒවාට නීතිඥයන් මඟින් මුහුණ දෙන බවද කියමිනි. එම නඩුවලින් නිදහස් වන්නට හෝ දඬුවම් ලබන්නට හෝ සිදුවිය හැකි බවත් එලෙස මුහුණදෙනවා විනා වෙනත් මාර්ගවල නොයන බවද වෙල්ගම කීවේය. වෙල්ගම මේ කීවේ මෙම ලියුම්කරු ඇතුළු බොහෝදෙනා වරින්වර කී සත්‍ය කතාවය. එනම් කළ වැරදිවලට දඬුවම් විඳීමෙන් ගැලවෙන්නට මෙම කල්ලිය ඉක්මනින් ආණ්ඩුව පෙරළා ගන්න හදන බවය. කෙසේ වෙතත් එය වඩාත් තහවුරුවන්නේ කුමාර වෙල්ගම වැනි ඒකාබද්ධයේ ජ්‍යෙෂ්ඨයකු සනාථ කරන විටය.
මහින්ද රාජපක්ෂ මහතා තම එකම නායකයා බව කියන ගමන් වෙල්ගම මහතා කියන්නේ එනමුත් පවුල් වාදයක් අවශ්‍ය නොවන බවය. මහින්ද රාජපක්ෂ මහතාට ජනාධිපති අපේක්ෂකයා විය නොහැකි නම් එම අවස්ථාව ඒකාබද්ධයේ ජ්‍යෙෂ්ඨයකුට ලබාදිය යුතු බවය. එයද වැදගත් ප්‍රකාශයකි. එසේ වුවද වෙල්ගම මන්ත්‍රීවරයාද තේරුම් ගත යුතු කරුණක් වන්නේ මහින්ද රාජපක්ෂ මහතා එදා මෙන්ම අදත් පවුල්වාදය ගොඩනඟමින් පවත්වාගෙන යමින් සිටින බවය.
මහින්ද ආණ්ඩු කරද්දී මේ රටේ සමස්ත අය-වැයෙන් සියයට හැත්තෑවක් වියදම් කළේ රාජපක්ෂලා තිදෙනකු විසිනි. ඒ මහින්ද රාජපක්ෂ, බැසිල් රාජපක්ෂ හා ගෝඨාභය රාපක්ෂය. ගෝඨාභය හා බැසිල් ගෙන්වා ගත්තේ ඇමෙරිකාවෙනි. ඔවුන් ගැන මේ රටේ ජනයා දැන සිටියේ ද අල්ප වශයෙනි. ටික කලක් යද්දී මේ දෙදෙනා සිටියේ ඇමැති මණ්ඩලයටද ඉහළිනි. මහින්ද රාජපක්ෂ පාලනය ක්‍රියාත්මක වුණේ සමස්ත ඇමැති මණ්ඩලයත් පක්ෂයත් යටපත් කරමිනි. නාමල්ලා, ශිරන්තිලා ද කරළියට ගෙනාවේය. එක දරුවකුට හැර අනෙක් දරුවන්ට සැලකූ ආකාරය ද මහජනයාට රහසක් නොවේ.
මහින්ද රාජපක්ෂ මහතා දැනටත් කරගෙන යන්නේ එය මය. ජනාධිපතිවරණයේ අපේක්ෂකයා ගැන ප්රශ්නය මතුකරන්නේ ගෝඨාභය ද, චමල් ද, බැසිල් ද වශයෙනි. එයට එක හේතුවක් නම් නාමල්ට වයස මදිවීමය. නාමල් වයස සපුරා සිටියානම් අනෙක් අයගේ නම් කියැවෙන්නේවත් නැත. ඇත්ත තත්ත්වය ඒකය. මෙය තේරුම් ගැනීමට ඒකාබද්ධයේ ජ්‍යෙෂ්ඨයකු වන කුමාර වෙල්ගම මහතාට නොහැකිවී ඇත්තේ ඔහු තවමත් දැඩි මහින්ද භක්තිකයකු වී සිටීම නිසා විය හැකිය. මේ රටේ සාමාන්‍ය ජනයාට නම් මේ කතාව අමුතුවෙන් කියාදිය යුතු නැත.
පොහොට්ටු පක්ෂය ගොඩනැඟීම භාරදුන්නේ බැසිල් රාජපක්ෂ මහතාටය. මහින්ද හැරුණුවිට එම පක්ෂයේ නොනිල නායකයා බැසිල්ය. එහි තිබෙන්නේ බැසිල්ගේ ආධිපත්‍යයය. වෙල්ගමත් කියන්නේ බැසිල් පක්ෂය හැදුවා කියාය. එම කාර්යය වෙනත් ජ්‍යෙෂ්ඨයකුට නොපැවරීම ගැන ප්‍රශ්න කරන්නේවත් නැත.
මේ වනවිට මහින්ද රාජපක්ෂ මහතා වැඩ පටන් අරගෙන තිබෙන්නේ නාමල් රාජපක්ෂ මහතා මීළඟ නායකයා ලෙස ගොඩනඟන්නටය. පසුගියදා ‘ජනබලය කොළඹට’ කියා අඩව්වක් ඇල්ලුවේ ඒකටය. එය සම්පූර්ණයෙන්ම සංවිධානයකොට මෙහෙයවන ලද්දේ නාමල් රාජපක්ෂ පිම්බෙන ලෙසටය. කෙසේ වෙතත් වැඩේ අසාර්ථක වීමෙන් නාමල්ගේ හුලං බැස්සේය. එසේ වුවද වැඩේ තාම ඇතහැර නැත. දැන් ඒකාබද්ධයේ ජ්‍යෙෂ්ඨ නායකයන් පසෙකය. ඒ වෙනුවෙන් පෙනී හිටින්නේ නාමල්ය. වගකීම් දෙන්නේ නාමල්ටය. මහින්ද රාජපක්ෂ ගානට වැඩේ කරගෙන යන්නේ එහෙමය.
එහෙම තිබියදී පවුල් වාදයට විරුද්ධ බව කියමින් මහින්ද වන්දනාවේ යෙදීමේ කුමාර වෙල්ගමගේ පිළිවෙත කිසිදා තේරුමක් නැති එකකි. මහින්ද තමාගේ එකම නායකයා කියනවිටම ඔහුගේ ක්‍රියාකාරීත්වය ද පිළිගෙන හමාරය. ඒ ක්‍රියාකාරීත්වය තුළ තිබෙන්නේ පවුල්වාදයය. ගොඩනඟන්නේ පුතාගේ දේශපාලන අනාගතයය. ඒ ගැන කිසිඳු අපැහැදිලි බවක් නැත. පක්ෂයේ අනෙක් සියලු දෙනාට සලකන්නේ රම්පේ, කරපිංචා ගානටය. වැඩ අරගෙන අහක දාන්නටය.
රම්පේ කරපිංචා න්‍යාය
තමන්ගේ නායකත්වයට කැපවී සේවය කරන පක්ෂයේ ජ්‍යෙෂ්ඨ නායකයන්ට පවා කොල්ලන් කුරුට්ටන් දමා ගස්සන්නේ ඒකටය. වෙල්ගමලා තවමත් තේරුම් ගෙන නැති පාඩම ඒකය.ජනාධිපති අපේක්ෂකත්වය පිළිබඳ බරපතළ ප්‍රශ්නයක් ඒකාබද්ධය තුළ මතුව ඇත්තේ ජනාධිපතිවරණය දිනිය හැකි අපේක්ෂකයකු එයට නැතිවීම නිසාය. ඒ කතාව කෙළින්ම කීවේ වාසුදේව නානායක්කාරය. ජනාධිපතිවරණයට පෙර ආණ්ඩුව පෙරළන්න ජනාධිපතිතුමා සමඟ සම්මුතියකට යන්න හැදුවේද ඒකටය. එයටද එක හේතුවක් නම් මහින්ද රාජපක්ෂ මහතා පක්ෂය තුළ වෙනත් නායකයන්ට ගොඩ නැ‍ඟෙන්නට ඉඩ නොදීමය. එකම නායක මහින්ද රාජපක්ෂ මිස වෙනත් නායකයන්ට මතුවන්නට දුන්නේම නැත. පක්ෂයෙන් පිට කිසිවකුට අවස්ථාව දුන්නේ නැත. වැඩක් කරන්නට ප්‍රතිපාදන දුන්නේ නැත. වගකීම් පැවරුවේ නැත. වැඩක් කරන්න හදනවිට කකුලෙන් ඇද්දේය. ජනාධිපති මෛත්‍රීපාල සිරිසේන මහතා මේ කතා බොහොමයක් කියා ඇත. මොරගහකන්ද ව්‍යාපාරයට මුල්ගල තැබූ හැටියේ ඇමැතිකම නැතික‍ළේ ඒකය. කුමාර වෙල්ගමලාටද සිදුව තිබෙන්නේ එකම නායකයා මහින්ද කියාගෙන පස්සෙන් යාමටය.
ඔටුනු පලඳා මුල්ලට කළ හැටි
තම ආණ්ඩුව තුළ තමන්ට අභියෝගයක් විය හැකි ප්‍රබලයන් කවුදැයි වරෙක මහින්ද හඳුනාගත්තේ ය. ඒ සියලු දෙනාට මහින්ද ඔටුනු දැම්මේ ජ්‍යෙෂ්ඨ ඇමැතිවරුන් වශයෙනි. පට්ටම විතරය. කිසිදු බලයක් නැත. වගකීමක් නැත. මුදල් ප්‍රතිපාදන නැත. මහින්ද දෙවන පෙළ නායකත්වය විනාශ කළේ එහෙමය. දැන් ජනාධිපති ධුර අපේක්ෂකත්වයට කෙනෙකු ඇමෙරිකාවෙන් ආනයනය කරන්නට සිදුවී තිබෙන්නේ එලෙස මහින්ද අනෙක් නායකයන් එකිනෙකා විනාශ කළ නිසාය.
ඒකාබද්ධ විපක්ෂයේ බොහෝදෙනාට ඉක්මන් ආණ්ඩුවක් අවශ්‍යව ඇත. ඒ බොහෝදෙනාට එරෙහිව නඩුවැටී ඇති නිසා බව දැන් අපිට සහතිකය. ජනාධිපති අපේක්ෂකත්වය ගැන යෝජනාවට ගහ බැන ගන්නේ ඒකටය. ඒ ඒකාබද්ධයේ අයගේ වුවමනාවය. කෙසේ වෙතත් මහින්ද රාජපක්ෂ මහතාගේ දේශපාලන ගේම් ගැන දන්නා උදවිය නම් කියන්නේ ජනාධිපතිවරණය දිනන්නට ඔහුට නම් කිසිම වුවමනාවක් නැති බවය. ඒ තමන්ගේ පැත්තෙන් නාමල් හැර වෙන කවුරු ජනාධිපතිවරණයට ආවත් එය නාමල් රාජපක්ෂගේ දේශපාලන අනාගතයට අයහපත් ලෙස බලපාන නිසාය. මේ මොහොතේ මහින්දට අවශ්‍ය වන්නේ ඊළඟ මහ මැතිවරණයකින් නාමල් රාජපක්ෂ විපක්ෂ නායකයා කරන්නට පමණය. නාමල් කුමාරයා ඔටුන්න හිමි කුමාරයා වන්නෙ එවිටය. ඒ නිසා මහින්දට ඕනෑ පරදින අපේක්ෂකයෙකි.
ගෝඨාභය රාජපක්ෂ මහතා ඒ අනුව නම් මේ වනවිට මහින්දගේ ජනාධිපති අපේක්ෂකයා වන්නට සුදුසුකම් සපුරා ඇත. ඒ ඔහුට දිනන්නට අවස්ථාවක් තිබුණා නම් මේ වනවිට ඔහු විසින්ම ඒ අවස්ථාව නැති කරගෙන තිබීම නිසාය. ඒ වැඩේ ඔහු කරගත්තේ ජාතිවාදී හමුදා නිලධාරීන් ඇතුළු අන්තවාදීන් පිරිසක් සමඟ රට වටා යෑම මඟිනි. එමඟින් ඔහු සුළුතරයකට කොටුවී ඇත. මුලදී තිබූ ගෝඨා රැල්ල පසුව විනාශවී ගියේය. මධ්‍යස්ථ බොහෝදෙනා ඉවත්වූහ. මුලින් ගෝඨා රැල්ලක් ගොඩනඟන්නට ලිපි ලියූ ආචාර්ය දයාන් ජයතිලක වැන්නන්ද එළිපිටම ඔහුට එරෙහි විය. මේ වනවිට ගෝඨාභයගේ ප්‍රචාරක ව්‍යාපාරය බිඳවැටී අවසන්ය. ඔහුට දැන් දිනන්නට බැරිය. ඒ නිසා මහින්දට හෝ නාමල්ට ඔහු තර්ජනයක් වන්නේ ද නැත.
ගෝඨා තරගයට දමා පොදුජන පෙරමුණට යන්තමට ඉතිරිව තිබෙන සුළුතර ජනයා අතර සුළු පදනම මෙන්ම මධ්‍යස්ථ ජනයාද දුරස්කර ගන්නවාද යන කාරණයද සැලකිල්ලට ගැනීමට මහින්දට සිදුවනු ඇත. ගෝඨාභයගේ ප්‍රචාරක ව්‍යාපාරය බිඳවැටීම ගැන මහින්දානන්දලා කුමාර වෙල්ගමට දෙස් දෙවොල් කීම තේරුමක් නැත. ගෝඨාගේ ඉරණම තීන්දු කළේ ඔහුගේම ගෝල බාලයන් මිස අන් කිසිවෙක් නොවේ. එමෙන්ම මහින්ද නැතිවිට පක්ෂයට නායකත්වයක් නැති කළේ මහින්දම මිස වෙන කවුරුවත් නොවන බවද කවුරුත් තේරුම් ගත යුතු කාරණයකි. මහින්ද පිටුපස තවදුර ගියත් කතාන්දරය ඕකය. ජ්‍යෙෂ්ඨයන් කළ යුතු වන්නේ සුදුසු වෙනත් මගක් සොයාගැනීමය.
සී.ජේ.අමරතුංග
