දෙව්දත්ට ලියුමක් – නිශාන්ත කමලදාස

දෙසැම්බර්

6

7:03 පෙ.ව.

admin

පළමුවෙන්ම ඔබට ආමන්ත්‍රණය කළ යුත්තේ කෙසේ දැයි නොදැන මා අතරමං ව සිිටි බව කිව යුතු ය. ඒ ගැටළුව ඇති වූයේ දේවදත්ත කුමාරයා ලෙස ද දෙව්දත් හිමියන් ලෙස ද දේවදත්තයා ලෙස ද ඔබව දක්වා ඇති නිසා ය. සසර පුරා ඇදී ගිය ඔබගේ පාපතර දිවිය නිසා ගරු නම්බු දීමට බැරි ය. ආනන්තරීය පාපකර්මයක් කර ආපායේ ගිය නමුදු ඔබ ද මතු බුදුවන බවට අසා ඇති නිසා දෙකේ කොළයට දමා කතා කරන්නට ද බැරි ය. මා ගැටළුවකට මැදි කළේ ඒ මහා පරස්පරය ය.

සාහිත්‍යයේ සඳහන් වන ලෙස ඔබට තිබිය හැක්කේ අප ඉරිසියාවෙන් පුරවන අපූරු වාසනාවන්ත ගුණයකි. මතු බුදුවන බෝධිසත්ත්වයන්ට එකක් හැර එකක් මුදා හල නපුරුකම් තිබිය දීම ඔහු සමග නැවත නැවතත් ඔය දුර්ලබ යයි අපේ හාමුදුරුවන් කියන මිනිස් ආත්මයක් ද ඇති ව උපදින්නටත් බෝධිසත්තවයන් තිරිසන් ආත්මයකට පහළ බැස ගත් විට ඔබට ද ඔහු අනුව යමින් තිරිසන් ආත්මයක් ලබා ගැනීමට හැකි වීමත් නිසා ඔබ අපූරු වාසනාවන්තයෙකු ලෙස ම හිතන්නට අපට සිදු ව තිබේ. එහි උත්කර්ෂය සනිටුහන් වන්නේ අප මහා බෝධිසත්වයන් බුදුවන ආත්මයේ ම එතුමාගේ ඇඹේනිය බවට පත් වන යසෝදරා කුමරුන්ගේ සොහොයුරා වන්නට ද ඔබ පින් ලබා තිබීම ය.

එවැනි පිනක් ලැබීමට ඔබ කළේ කුමක් දැයි අපට හිතාගන්නටවත් බැරි ය. එහෙත් එවැනි පිනක් දහමක් නොකර එවැනි වාසනාවන්ත තත්වයක් ඇති කර ගැනීමට අපහසු බව මොකක් හෝ හේතුවක් නිසා අපට හැගෙන්නේ ය. කවරෙකු විසින් හෝ අපට දැනගන්නට බැරි වන ලෙස සගවා තිබෙන ඔබේ පින් දහම් කවරේ දැයි දැන ගැනීමේ පිපාසාවක් මට තිබේ. එහෙත් එයට ඉගියක් වත් මා ඇසුරු කළ පොත පතේ වත් මා ඇසූ අනේක ධර්ම දේශණා වල වත් තිබුනේ නැත. මා මේ ලිපිය ලියූ එක් හේතුවක් වන්නේ ඒවා කවරේදැයි ඔබගෙන්ම අසා දැනගන්නට ය.

සසුන රැක ගැනීමට දැඩි විනය නීති පනවා භික්ෂූන් හික්මවිය යුතු යැයි කියමින් බුදුන්ටත් වඩා බුදු කෙනෙකු වීමට ඔබ දැරූ උත්සහය අපට සිහි ගන්වන්නේ වත්මන දකින්නට ලැබෙන බහුතරයක් භික්ෂූන් වහන්සේලා ය. ගිරිය කඩා ගෙන කෑ ගසන දෙමළුන් කොටීන් කර උස්සා පොළොවේ ගසන බුදුන්ටත් වඩා ඉදිරියට යමින් බුදු දහම රැක ගන්නට කැස කවන නූතන සග පරපුර ය. එහෙම බලන විට අපට පෙනෙන්නේ බුදුන්ගේ අනුගාමිකයන්ට වඩා ඔබේ අනුගාමිකයන් අපේ සසුන තුළ ඉන්නා බව ය.

නිර්මාංශව සිටිය යුතු බව ට ඔබ ගෙනා සිල්පදය බුදුන් බැහැර කළ බව සඳහන් වෙතත් එය නැවතත් ඉහළට ඔසවා තබන, විශේෂයෙන් ගව මස් සම්බන්ධයෙන් සුවිශේෂ සිල්පදයක් සමග නැවත දොරට වඩින, එය ස්වාමීන්වහන්සේලා විසින් පමණක් නොව ගිහියන් ද අනුගමනය කළ යුතු බවට දෙසන, ඒ සංඝරත්නයෙන් පෙන්නුම් කරන්නේ ඔබේ නැවත ආගමනය ඔබ අවිචී නිරයෙන් නික්මෙන්නටත් පෙර සිදු ව ඇති බව ය.

අප අසා ඇති හැම කතාවකම බුදුන් හා අවසානය වෙනතෙක් ෆයිට් එකක් දීමට ඔබට වූ හැකියාව නිසි ලෙස අගැයීමට ලක් නොවීම ද පුදුම ය. සාරා සංකේය කල්ප ලක්ෂයක් පෙරුම් පිරූ බුදු වරයෙකුට එරෙහිව එවැනි සටනක් දීමට පව් වල ප්‍රතිමුර්තිය වූ ඔබට හැකි වීම ම අති විශාල ජයක් ලෙස මම නම් සළකමි. මා ඔබට මේ ලියුම ලියන්නට දෙවැනි හේතුව මේ හයිය ඔබ ලබා ගත්තේ කුමන් බලවේගයෙන් ද යන්න දැන ගැනීමට ය. අප හිතුවාට එය කර්ම ශක්තිය නම් නොවිය හැකි නිසා ය.

මේ ලිපිය අවිචියට ගෙන යෑමට සමත් භික්ෂුන් ගණනාවක් ම ශ්‍රී ලංකාව තුළ සිටීම මා ලැබූ වාසනාවකි. එයින් කෙනෙකු අතේ මේ ලියුම ඔබට ලැබිය හැකි ලෙස අන්තර්ජාලයට මම මුදාහරින්නෙමි. අපායේ ඉන්ටර්වල් ලැබුනු වෙලාවක ඔබ මට උත්තරයක් එවනු ඇතැයි අපේක්ෂා කරමි.

(ප.ලි. – හැම වීරයෙකුම උපත ලබන්නේ දුෂ්ඨයෙකුගේ ආධාරය ඇතුව ය. එහෙම බැලුවහම ඔබ බෝධිසත්ත්වයන් ට දී ඇත්තේ අතිශයින් වටනා බකප් එකකි. සමහර විට ඊනියා කර්ම බලවේගය ඒ ගැන අගැයීමක් කරමින් ඔබව නැවත නැවතත් බෝධිසත්ත්වයන් සමගම උත්පත්තිය ලබන්නට ඉඩ හසර ලබා දුන්නා විය හැකි ය. ඒ මගේ අනුමානය ය. ඔබේ උත්තරය මට ඒ අනුමානය තහවුරු කර ගැනීමට හෝ ඉවත ලෑමට අවස්ථාව සලසන බැවින් අතිශයින් වැදගත් ය. ඒ නිසා හැරෙන තැපෑලෙන් උත්තර එව්වොත් ඔබට පින් සිද්ධ වෙනවා ය. දෙව් මිනිස් සැප කෙළවර අමා මහ නිවනට ඒ පින් හේතු වේවා වාසනා වේවා යයි මම අවසාන වශයෙන් පතමි.)

 

අදහස්


ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *