අපේ හාමුදුරුවනේ, මුන් ධර්ම චක්‍රයෙන් කොකිස් හදලා – නිශාන්ත කමලදාස

දෙසැම්බර්

18

9:11 පෙ.ව.

admin

ධර්ම චක්‍රයක් විදිහට පෙ15442164_1834305606853825_6241016168056098986_nනෙන සේ සකස් කරන ලද පිටි ඇනුම ගැඹුරු නටන තෙල් තාච්චියක දමා බදින්නේ මොන හිතකින් ද යනු මට හිතා ගන්නටත් බැරි ය.

අපි හිතුවාට කොකිස් දේශීය කෑමක් නොවේ. එය ලන්දේසි කෑමකි. ඒ අරුතෙන් ධර්ම චක්‍රය තෙලේ බදින්නට සලස්වා ඇත්තේ ලන්දේසීන් ය. බුදු රුවක් වෙනුවට ධර්ම චක්‍රය යොදා ගෙන ඇත්තේ අපහාසය කෙළින් නැතුව වක්‍රව කරන්නට ය.

තෙලේ බැද්දාට අමතරව අප ලවා ම එය හපා කෑමට සැලැස්වීමට ද මේ උන්දැලා සමත් විය. හිතට වඩාත් අමාරු එය සිංහල අවුරුදු මේසයට ද රිංගවා දේශීය කිරීම ය. වසරක් පාසා අපට ම කැවීමට සැලැස්වීම ය. මේ සියල්ල විමසන විට මේ කුමන්ත්‍රණය කොතරම් සූක්ෂම විදිහට සැලසුම් කර ඇත් දැයි සිතා ගත හැකි ය.

සපත්තුවක ගසා ඇති නාවික සුක්කානමක් ධර්ම චක්‍රය ලෙස හඳුනාගැනීමට උත්සහ කරන භික්ෂූන් සිටින රටක  මේ කොකිස් කුමන්ත්‍රණය ඒ උන්නාසේලාට පවා තේරුම් නොයෑමෙන් පෙනෙන්නේ එය කොතරම් සූක්ෂම ලෙස සැලසුම් කර ඇති බව නොවේ ද?

download

දැන් වත් සිවුරු හමුදාව හෝ බොදු බලය හෝ රාවණා අවතාරය හෝ මේ පිළිබඳව මැදිහත් වුනොත් හොඳ ය. ඊළග සිංහල අවුරුද්දට පෙර ඒ අය රැස්වී මේ ගැන තීරණයක් ගෙන අපට දන්වනවා නම් හොඳ ය. නැතිනම් 2017 අපට ද ගුටි කන්නට හදිසියේ සිදු වුනොත් කියලා දැනට ම බියක් දැනේ.

මම නම් අපේ හාමිනේට කිව්වේ ඩෙංගු හැදෙන තැන් බලන එකේ ධර්ම චක්‍රය වගේ පේන ඒවා හරි හමන් තැන් වල තබා තියෙනවා ද කියලා බලන්නට කියා ය. ඩෙංගු හැදෙන මොකක් හරි තිබුනොත් දඩයක් ගෙවා බේරෙන්නට පුලුවන. එහෙත් ධර්ම චක්‍රයට අපහාසයක් වී තිබුනොත් ගමේ ඉඳලාත් හමාර ය.

සමහරු නම් කියන්නේ හාමුදුරුවන් ගමෙන් එලියට අඩිය තබා නැති නිසා නැවක සුක්කානමක් දැක නැති වීම පසුගිය දොහක සාප්පුවක ඇති වූ කලබැගෑනියට හේතුව බව ය. මට නම් හිතෙන්නේ පරක්කු වෙලා හරි ධර්ම චක්‍රය සුක්කානමකට යෙදීමේ කුමන්ත්‍රණය සොයා ගැනීමට අපේ හාමුදුරුවන්ට පුලුවන් වුනේ ම ඒ නිසා බව ය. පළමුවෙන් එය සුක්කානමකට ගන්නට ඇත්තේ පස්සේ කාලෙක සපත්තුවට යෙදීමේ අරමුණ ඇතිව වෙන්නට බැරි ද? අප නිතර කන අපේ දේශීය කෑමක් යයි අපි හිතන කොකිස් වගේම ඕකත් අහු නොවී යන්නට ඉඩ තිබුනේ ය. එහෙම බැලුවහම හාමුදුරුවන් ලෝකය ගැන නොදැන සිටීම හොඳ ය. ගමෙන් එහා දෙයක් නොදැක තිබීම වඩාත් හොඳ ය. බුද්ධාගම බේරා ගැනීමේ මාවත වැටී තිබෙන්නේ නොදැනුම හරහාය යන රුවන් වැකිය ඒ අනුව අප නිතර නිතර සිහිපත් කළ යුතු ය. අප ඉන්නා හතර මායිමෙන් එහාට අප ජිවත් වන කොදෙව්වෙන් එහාට හිත හෝ ඇස යොමු නොකළ යුතු ය.

අදහස්


ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *